«Yuventus» bosh murabbiyi Maurisio Sarri Italiya chempionati doirasida bo‘lib o‘tgan «Kalyari»ga qarshi o‘yin (0:2) borasida o‘z fikrini bildirib o‘tdi.

«Muammo shundaki, biz 12 kun ichida 5ta o‘yin o‘tkazadigan Yevropadagi yagona jamoamiz. Ertaga o‘yinchilarning holatini ko‘zdan kechirib, «Roma»ga qarshi bahsda asosiy tarkibga dam berib, U23 tarkib bilan o‘ynash masalasini o‘ylab ko‘ramiz.

Motivasiya va jonbozlik borasida bugungi bahs o‘zgacha bo‘ldi. Bu o‘yinni boshqa uchrashuvlar bilan taqqoslab bo‘lmaydi. Uzatmalarni yaxshi oshirdik, ammo o‘zimiz istagandek tez harakat qila olmadik. Sekin berilgan uzatma raqibning ishini osonlashtiradi.

To‘qqiz o‘yinchimiz jarohat tufayli o‘z uylarida qolishdi. Shuning uchun «Lion»ga qarshi o‘yin oldidan ayrim shubhalar mavjud. Ko‘ramiz, qaysi o‘yinchi safga qaytar ekan», — dedi Sarri.

Yevropa chempionlar ligasi nimchorak final bosqichi doirasidagi «Yuventus» — «Lion» uchrashuvi 7 avgust kuni o‘tkaziladi. Dastlabki o‘yinda turinliklar 0:1 hisobida yutqazishgan.