Har yili transfer oynasi ochiladi va klublarimiz u yoki bu o‘zgarishlarni amalga oshiradi. Biz buni cheklash yo‘liga o‘tamiz.

Sababi, har yili futbolchilar u klubdan bu klubga ko‘chib yuradi. Vaholanki, Futbolchilar maqomi va o‘tishi bo‘yicha reglament talablariga ko‘ra, mana shu ko‘chishlarga to‘lanishi kerak bo‘lgan summalar bor. Klublar bunga bee’tibor munosabatda bo‘lgan, klubdan klubga o‘tgan futbolchi uchun transfer yoki kompensasiya summalari to‘lanishi shart. Klublar va nihoyat buning orqasidan pul ishlash yo‘liga o‘tishlari kerak.

Murabbiy keladi, 10 futbolchiga javob beradi va yangi 10 futbolchini olib keladi. Ish bu zaylda davom etmaydi. Murabbiyning xohishlaridan ko‘ra, klub bilan futbolchi o‘rtasida tuzilgan shartnoma ustuvor bo‘lishi shart. Butun dunyoda shunday ishlanadi. Yoki aksincha, murabbiy o‘ziga kerak bo‘lmagan futbolchilar ro‘yxatini taqdim etsa, klub rahbariyati ularni sotish, ijaraga berish, lozim ko‘rilganda shartnomani bekor qilish ustida reglament doirasida ish olib borishi kerak.  

Klublar yuz millionlab transfer va kompensasiya summalarini majbur to‘lashni boshlaganlaridan keyingina, aslida o‘z akademiyalarini rivojlantirishlari, suvga oqayotgan pul mana shu akademiya tarbiyalanuvchilariga berilishi ming marta foydaliroq ekanini tushunib yetadi.

Ma’lumot uchun, 10-31 avgust kunlari bizda yozgi transfer oynasi ochiq. Mana shu muddatda ko‘plab klublar o‘zgarishlarni amalga oshira olmaydi. Shundan kelib chiqib, futbolchilar mavsum o‘rtasida shartnomalarini bekor qilishga shoshilishmasin. Kimning kimdan qancha qarzi borligi har bir klubga alohida taqdim etiladi. O‘zPFL rasmiy sayti barcha o‘tishlar borasida ma’lumot taqdim etib boradi.

Diyor Imomxo‘jayev.