Londondagi «Uembli» stadionida Angliya superkubogi uchrashuvi bo‘lib o‘tdi. Unda APL g‘olibi «Liverpul» hamda Angliya kubogi sohibi «Arsenal» jamoalari to‘qnash kelishdi.

Birinchi bo‘limda "kanonirlar" ustunlikka ega bo‘lishgan bo‘lsa, ikkinchi taymda tashabbus mersisaydliklar tomonida bo‘ldi. Shunga mos ravishda bahsning 12-daqiqasida Obameyang hisobni ochgan bo‘lsa, 73-daqiqada Minamino muvozanatni tikladi.

O‘yinda qo‘shimcha bo‘limlar belgilanmadi hamda navbat darhol penaltilar seriyasiga berildi. "Arsenal"ning besh futbolchisi zarbada adashmagan bo‘lsa, "Liverpul" a’zosi Rian Bryuster yo‘llagan zarba natijasida to‘p to‘singa tegib, yuqoriga ko‘tarilib ketdi.

Shu tariqa, "Arsenal" yangi mavsumni Angliya superkubogi sovrini bilan boshladi.

Angliya superkubogi.
Arsenal – Liverpul 1:1 (1:0, 0:1), Penaltilar seriyasi - 5:4
Gollar: 1:0 – 12 Obameyang, 1:1 – 73 Minamino.
Arsenal – Martines, Belyerin (Soaresh, 58), David Luiz, Tirni (Kolashinas, 83), Meytlend-Naylz, El-Nenni, Djaka, Saka (Uillok, 82), Xolding, Obameyang, Nketia (Nelson, 82).
Liverpul – Alisson, van Deyk, Gomes, Robertson, Uilyams (Minamino, 59), Milner (Keyta, 59), Veynaldum (Bryuster, 90), Fabinyo, Mane, Salax, Firmino (Djons, 83).
Ogohlantirishlar: Milner (57).