Coca Cola superligasi 14-tur doirasidagi "Buxoro" - "Qo‘qon-1912" uchrashuvidan keyingi matbuot anjumanining birinchi qismida jamoamiz ustozi Baxtiyor Ashurmatov ishtirok etdi.

- Gapni ochig‘i, juda alamli durang bo‘ldi. So‘nggi daqiqalarda biroz e’tiborni yo‘qotdik va bu xato bizga qimmatga tushdi. Maydonda son jihatdan ham o‘yin jihatidan ham ustunlik qilayotgandik. Afsuski futbolda daqiqalar va soniyalar ham ko‘p narsani hal qiladi, afsuski o‘yin oxirida gol o‘tkazib yubordik. Natijada judayam qimmatli ochkolarni qo‘ldan boy berdik.Sababi bizni yaqin raqobatchilarimizdan biri bo‘lgan "Nasaf" jamoasi kecha g‘alaba qozondi. Biz g‘alabani ko‘zlagan holda maydonga tushgandik. Afsuski, durang natija qayd etildi. “Buxoro” jamoasi bugun ham oxirigacha kurashdi va o‘zi uchun qimmatli ochkolarni qo‘lga kiritdi. Ularning AGMK jamoasi bilan o‘yinlarini ko‘rib chiqqandik. Ular har bir o‘yinda so‘nggi jangga chiqqandek harakat qilishyapti. Har ikki jamoa futbolchilariga jangovar o‘yin uchun rahmat aytaman.

Gapni ochig‘i, o‘yin oxirida gol kiritganimizda bugun ham g‘alaba qozonishimizga ishonayotgandim. Chunki, so‘nggi uchrashuvlarda aynan uchrashuv yakunlanishi arafasida yigitlarimiz xarakter ko‘rsatib, gol kiritishayetgan va g‘alaba qozonayotgandik. Bugun esa futbolda oldindan xursand bo‘lmaslik lozimligini o‘yin ko‘rsatib berdi. Futbol shunday o‘yinki, so‘nggi soniyalarda ham barchasi o‘zgarib ketishi mumkin.