UEFA Chempionlar ligasining yangi formatini ishlab chiqmoqda. Top-klublar Superliga tashkil qilishga tayyorgarlik ko‘rayotganidan kelib chiqib, UYEFA yangi formatni taklif qilmoqchi.

"AS" tarqatgan xabarga ko‘ra, UEFA prezidenti Aleksander Cheferin Yevropa klublari assosiasiyasi (ECA)ga a’zo 5ta klub — «Real», «Yuventus», «Manchester Yunayted», «PSJ» va «Fenerbaxche» bilan muzokara olib bormoqda. Cheferin bu klublarga yangi format orqali yuqori rol va katta daromad taklif qilmoqchi. G‘oyaga ko‘ra, Chempionlar ligasini o‘tkazadigan yangi kompaniya tashkil etiladi hamda UEFA va ishtirokchi-klublar unda o‘z ulushlariga ega bo‘lishadi.

Hozirda 2024 yildan boshlab dastlabki 10 yillik loyiha haqida muzokaralar olib borilmoqda. Agar tomonlar tez kelishuvga erishishsa, yangi musobaqa 2023 yil, hattoki 2022 yildan ham boshlanishi mumkin. Ma’lumotlarga qaraganda, FIFA prezidenti Janni Infantino UEFA rahbarini qo‘llab-quvvatlagan.

Shuningdek, yangi musobaqa manfaati yo‘lida ba’zi musobaqalar qurbon bo‘lishi mumkin. Jumladan, milliy chempionatlardagi klublar soni 16tagacha, mamlakatlar kuboklarning bosqichlari soni qisqarishi kutilmoqda.