Angliya Premyer Ligasining 34-turidan o‘rin olgan qoldirilgan bahsda «Manchester Yunayted» va «Liverpul» jamoalari o‘zaro to‘qnash keldi.

Uchrashuvning 10-daqiqasida Brunu Fernandesh mankunianlarni oldinga olib chiqdi. Bunga «qizillar» uchta gol bilan javob qaytardi: 34-daqiqada Diogu Jota muvozanatni tiklagan bo‘lsa, Roberto Firmino birinchi bo‘lim so‘nggi va ikkinchi bo‘lim boshida ikkita gol urib, muvozanatni «Liverpul» tomonga burdi.

68-daqiqada Markus Reshford maydon egalarining ikkinchi golini urdi. uchrashuv yakunlanishi arafasida Muhammad Saloh jamoasining qarshi hujumini muvaffaqiyatli yakunlab, yakuniy hisobni o‘rnatdi — 2:4.

Ushbu g‘alabadan keyin «Liverpul» ochkolarini 60 taga yetkazib olgan holda 5-o‘ringa ko‘tarildi. Bitta zaxira o‘yinida ega Yurgen Klopp shogirdlari 4-pog‘onadagi «Chelsi»dan 4 ochko ortda qolmoqda. «Manchester Yunayted» esa 70 ochko bilan 2-o‘ringa joylashgan.

APL, 34-tur
13 may, payshanba
«Manchester Yunayted» — «Liverpul» 2:4
Gollar: 1:0 – 10 Brunu Fernandesh, 1:1 – 34 Diogu Jota, 1:2 – 45 Firmino, 1:3 – 47 Firmino, 2:3 – 68 Reshford, 2:4 – 90 Saloh.
«Manchester Yunayted»: Henderson, Shou, Lindelyof, Bayi (Matich, 86), Uan-Bissaka, Maktominey, Pogba, Fred (Grinvud, 63), Brunu Fernandesh, Kavani, Reshford.
«Liverpul»: Alisson, Fillips, Uilyams, Aleksander-Arnold, Robertson, Fabinyo, Veynaldum (Jons, 74), Saloh (Uilyams, 90), Tiago Alkantara, Diogu Jota (Mane, 74), Firmino.
Ogohlantirishlar: Bayi (48), Maktominey (79), Kavani (85).