Turinning “Yuventus” klubiga Massimiliano Allegri qaytgani jamoa ichidagi muhitni butkul o‘zgartirib yubrishi aniq. So‘nggi yillar ichida Jahon futbolida yuz bergan iste’folar ichida eng g‘alatisi shubhasiz – Allegrining ketishi bo‘lgandi. Turinliklar bilan 5 marotaba “A” Seriya chempioni bo‘lgan, ikki marotaba CHL finaliga yetib borgan mutaxassis orada hech bir klubda ishlamadi. Endi esa u qaytgach kun tartibida Krishtianu Ronaldu bilan munosabatlar mavzusi yana birinchi o‘ringa ko‘tarilmoqda. Zotan, Italiya matbuotining yozishicha, 2019 yil Allegri klubdan ketar ekan prezident Anyelliga – “Ronaldudan voz kechmasang u klubga o‘sish imkonini bermaydi” – deb aytgan.

Ta’kidlanishicha, Ronaldu katta o‘yinlarda ko‘rinmay qolmoqda. “Kalyari”, “Udineze” va “Krotone” kabi klublarga qarshi gollarni “taxlab” tashlayotgan bo‘lsa, “Milan” yoki “Inter”ga qarshi u keragidek ko‘rinmayapti, deyishmoqda ayrim kuzatuvchilar.

Albatta yuqoridagi voqea mish-mish yoki jurnalistlarning fantaziyasi bo‘lishi mumkin, orada (2020 yil qishida) Allegri Ronaldu manzili tomon bir qator iliq fikrlarni ham yo‘llab bo‘ldi. Shuningdek, shu yil iyun oyida ikkisi alohida uchrashib olgani haqida ham ma’lumotlar bor. Biroq ommaga nimalar haqida gap borgani haqida hech qanday xabar sizib chiqqani yo‘q.

Ronalduning klub bilan shartnomasi 2022 yil yozida nihoyasiga yetadi. Ko‘rinishidan jamoa oldida uning imkoniyatlaridan maksimum foydalanishdan boshqa chora qolmayapti. Boisi, bozorda “KriRo” uchun munosib haq to‘lashi mumkin bo‘lgan boshqa jamoa ko‘rinmayapti. MYU va “Real” variantlari o‘yindan chiqib ulgurdi. PSJ varianti bor, ammo parijliklar Ikardi bilan almashish orqali Ronalduga ega bo‘lishmoqchi. Bu "Yuve" uchun ham, Ronaldu uchun ham qoniqarli yo‘l emas. Demak, bizni Ronaldu va Allegri hamkorligidagi eng kamida yana bitta mavsum kutmoqda.

Hozirda yaqinlari bilan ta’tilda bo‘lgan Ronaldu dushanba kuni klub ixtiyoriga qaytishi va “Berluskoni kubogi” doirasida 31 iyul kuni bo‘lib o‘tadigan “Monsa”ga qarshi o‘yinda maydonga tushishi kutilmoqda.  

Orif Tolipov.