Oxirgi yillarda barqaror o‘yini bilan super jamoalar orasida yetakchi bo‘lib kelayotgan «Bavariya» jamoasi haqida ma’lumot berib o‘tamiz.
UYEFA reytingi (2020/21 yakuni): 1
Qanday yetib kelishdi: Germaniya chempioni
O‘tgan mavsum: chorak final (mag‘lubiyat, safardagi gol hisobiga «PSJ»dan)
Yevrokuboklardagi eng yaxshi natijasi: g‘olib (1973/74, 1974/75, 1975/76, 2000/01, 2012/13, 2019/20)
Bosh murabbiy: Yulian Nagelsmann
34 yoshli mutaxassis endilikda Hans Flik boshqaruvidan keyin klubda katta ishlarni davom ettirishiga to‘g‘ri keladi. Nagelsmann 2016 yilda «Xoffenhaym» tizginini o‘z qo‘liga olgan holda 28 yoshida Bundesliga tarixidagi eng yosh murabbiyga aylangan edi. Bir mavsum o‘tib, klub bilan to‘rtinchi o‘rinni egallagan holda Chempionlar Ligasi yo‘llanmasini qo‘lga kiritganidan xabaringiz bo‘lsa kerak. U yozgi transferlar oynasi ochiq vaqtda «Bavariya»ga o‘tishdan oldin ikki mavsum «Leypsig»da ham yaxshi taassurot qoldirdi va Chempionlar Ligasi yarim finaliga qadar yetib bordi.
Asosiy o‘yinchi: Robert Levandovski
Gol urishdan to‘xtamayotgan polshalik hujumchi o‘tgan mavsum Bundesligada 41 goli bilan «Bavariya»ning ketma-ket to‘qqizinchi chempionligi uchun yordamlashdi va Gerd Myuller tomonidan o‘rnatilgan rekordni yangiladi (40 gol). Shuningdek, Chempionlar Ligasidagi gollar soni bo‘yicha musobaqa tarixida Raul Gonzalesni ortda qoldirgan holda ro‘yxatda uchinchi o‘ringa ko‘tarilib olishga erishdi.
Yozgi eng katta xaridi: Dayo Upamekano
22 yoshli markaziy himoyachi 2017 yilda «Zalsburg»dan «Leypsig» klubiga o‘tganidan keyin yanada kuchayib bordi va yaqin mavsumlarda Nagelsmann qo‘lostida Chempionlar Ligasida yaxshi taassurot qoldirdi. Shavqatsiz, kuchli fransiyalik endilikda jamoadan ketgan fulbeklar - David Alaba hamda Jerom Boatenglarning o‘rnini bemalol to‘ldira oladi.
O‘yinini ko‘rish kerak: Jamal Musiala
«Bavariya» tarixida Bundesligada maydonga tushgan eng yosh futbolchiga aylangan Musiala o‘sha paytda 17 yosh va 115 kunlik edi. Oradan uch oy o‘tib, ya’ni 2020 yilning iyun oyiad klub tarixida chempionatda gol urgan eng yosh futbolchi bo‘lishga ham erishdi. O‘tgan mavsum xavbek Jamal 37 uchrashuvda hisobiga 7 gol yozdirib qo‘yishga erishdi.
Bilasizmi?
«Bavariya» o‘tgan mavsum Chempionlar Ligasi guruh bosqichi 5-turida o‘tkazilgan «Atletiko»ga qarshi o‘yinnga qadar musobaqada ketma-ket 15 g‘alaba qayd etib, rekord o‘rnatishga muvaffaq bo‘lgan.
Joriy mavsum E guruhida ishtirok etayotgan myunxenliklar birinchi turda "Barselona"ga safar qilib, mezbonlar darvozasiga uchta to‘p kiritishdi. Ushbu guruhda «Benfika» va "Dinamo Kiyev" jamoalari esa o‘zaro 0:0 hisobida durang o‘ynashdi. Ikkinchi turda Germaniya grandi o‘z maydonida Ukraina vakilini qabul qiladi. Bahs 29 sentyabr kuni Toshkent vaqti bilan 23:55da boshlanadi.
