2005 yilda tug‘ilgan futbolchilar o‘rtasida bo‘lib o‘tayotgan O‘zbekiston chempionatining final bosqichi o‘z yakuniga yetdi.

Finalga barcha raqiblarini mag‘lubiyatga uchratib, Toshkent shahri va Namangan viloyati terma jamoalari yetib kelishdi. Eng kuchli 2 ta terma jamoa o‘rtasida bahs ham o‘ta murosasiz ruhda kechdi.

Har ikkala jamoa futbolchilari ham asosiy e’tiborini xato qilmaslikka qaratishdi. Teng kurashlar ostida kechgan o‘yin taqdirini yagona gol hal qildi va bu gol poytaxtliklarga chempionlikni keltirdi.

Namangan viloyati terma jamaosi – Toshkent shahri terma jamoasi 0:1.

Uchinchi o‘rinni finalchilarga imkoniyatni boy bergan Farg‘ona va Andijon viloyati terma jamoalari qo‘lga kiritishdi.

Musobaqaning taqdirlash marosimida O‘FA bolalar-o‘smirlar va ommaviy futbolni rivojlantirish bo‘limi boshlig‘i Ma’mur Saidkasimov, Andijon futbol assosiasiyasi vise-prezidenti Bekzodbek Karimov, faxriylar, OAV vakillari, shuningdek, keng jamoatchilik ishtirok etishdi. G‘olib va sovrindorlarga medal va esdalik sovg‘alari topshirildi.