2005 йилда туғилган футболчилар ўртасида бўлиб ўтаётган Ўзбекистон чемпионатининг финал босқичи ўз якунига етди.
Финалга барча рақибларини мағлубиятга учратиб, Тошкент шаҳри ва Наманган вилояти терма жамоалари етиб келишди. Энг кучли 2 та терма жамоа ўртасида баҳс ҳам ўта муросасиз руҳда кечди.
Ҳар иккала жамоа футболчилари ҳам асосий эътиборини хато қилмасликка қаратишди. Тенг курашлар остида кечган ўйин тақдирини ягона гол ҳал қилди ва бу гол пойтахтликларга чемпионликни келтирди.
Наманган вилояти терма жамаоси – Тошкент шаҳри терма жамоаси 0:1.
Учинчи ўринни финалчиларга имкониятни бой берган Фарғона ва Андижон вилояти терма жамоалари қўлга киритишди.
Мусобақанинг тақдирлаш маросимида ЎФА болалар-ўсмирлар ва оммавий футболни ривожлантириш бўлими бошлиғи Маъмур Саидкасимов, Андижон футбол ассоциацияси вице-президенти Бекзодбек Каримов, фахрийлар, ОАВ вакиллари, шунингдек, кенг жамоатчилик иштирок этишди. Ғолиб ва совриндорларга медаль ва эсдалик совғалари топширилди.