«Барселона»нинг 20 ёшли вингери Руни Барджи тиззасидан жароҳат олди. Бу ҳақда журналист Карлос Монфорт хабар бермоқда.

Манба маълумотларига кўра, швециялик футболчи машғулот вақтида шикастланган. Швед кучли оғриқ ҳис қилиб, майдонни тарк этган. Барджининг тиззадаги хочсимон боғламлари узилган бўлиши мумкинлиги ҳақида гумонлар бор. Агар ташхис тасдиқланса, Ламин Ямаль ўрнини босиб турган ўйинчи камида ярим йилга сафдан чиқади.

«Барселона» ҳужумчини ўтган ёзда сотиб олган эди. «Кўк-анорранглилар» сафида у барча турнирларда 28 та ўйинда майдонга тушиб, 2 та гол урди ва 4 та голли узатмага муаллифлик қилди.

Барджининг каталонияликлар билан амалдаги меҳнат шартномаси 2029 йилгача мўлжалланган.