Ўзбекистонда халқаро майдонда юқори натижа қайд этадиган шахматчиларни рағбатлантириш тизими янгиланди. Президентнинг 2026 йил 21 сентябрдаги ПҚ–346-сон қарорига мувофиқ, нуфузли мусобақалар ғолиб ва совриндорлари учун бир марталик пул мукофотлари янги миқдорда белгиланди.

Энг катта мукофот Бутунжаҳон шахмат олимпиадаси ва паралимпиадасида катталар ўртасида чемпион бўлган спортчиларга берилади. Олтин медаль соҳиби 200 минг АҚШ доллари, кумуш медаль эгаси 100 минг, бронза учун эса 50 минг доллар олади. Илгари ушбу тўловлар БҲМга боғланган ҳолда ҳисобланар эди.

Ёшлар ўртасидаги Бутунжаҳон шахмат олимпиадаси ва паралимпиадасида ғолиб чиққанларга 20 минг доллар ажратилади. Иккинчи ўрин учун 10 минг, учинчи ўрин учун эса 5 минг долларлик мукофот назарда тутилган.

FIDE таснифи бўйича жаҳон даражасидаги турнирларда чемпионлик 15 минг доллар билан рағбатлантирилади. Кумуш медаль учун 7,5 минг, бронза учун 3 минг 750 доллар берилади.

Осиё миқёсидаги мусобақаларда эса биринчи ўрин соҳиби 10 минг доллар, иккинчи ўрин эгаси 5 минг, учинчи бўлган шахматчи 2,5 минг доллар олади.

Янги тартиб халқаро унвонларга ҳам тааллуқли. Халқаро гроссмейстер мақомига эришган ўзбекистонлик шахматчига бир марталик 5 минг доллар мукофот тўланади.