Антонио Матеу Лаос «Атлетико» – «Реал» (2:1) учрашуви бош ҳаками Мигель Анхель Ортис Арьяснинг Ли Кан Инни Федерико Вальвердега нисбатан қўпол фоли учун жазоламаслик қарорига муносабат билдирди.

«Барчамиз кўрган кадрда вазият жуда аниқ — хавф ниҳоятда катта эди. Умид қиламанки, жиддий жароҳат йўқ. Аммо биз бундай ҳаракатлар қизил карточка билан жазоланишига ўрганиб қолганмиз», — деди Ла Лиганинг собиқ ҳаками El Día Después дастурида.

Лаос, шунингдек, ҳакам танаффус пайтидаёқ вазият такрорини кўриб чиққан бўлишига ишонч билдирди. Унинг фикрича, Вальверденинг дарҳол ўрнидан туриб, норозилик билдиришни бошлагани видеоҳакам Даниэль Трухильо Суареснинг вазиятга берган баҳосига таъсир қилган бўлиши мумкин.

«Охир-оқибат Вальверденинг ҳаракати VARнинг вазиятга аралашишига тўсқинлик қилди. Буни тушуниш жуда қийин, чунки бундай ҳолатда мутлақо бошқача қарор қабул қилиниши керак эди. Кўпинча VAR футболдан кўра математика билан кўпроқ шуғулланаётгандек туюлади», — деди собиқ ҳакам.

Лаос футболчининг майдондаги реакцияси жазо миқдорига таъсир қилмаслиги кераклигини ҳам таъкидлади.