Winna FC саҳифасида хабар қилинишича, «Олтин тўп» учун овоз беришда «Бавария» ва Англия терма жамоаси ҳужумчиси Харри Кейн ғолиб чиққан. Нашрда таъкидланишича, футболчига ғалаба қозонгани ҳақида хабар берилган ва у билан фотосессия ўтказиш режалаштирилган.
Бироқ бу маълумот манбаси ишончлилиги шубҳа уйғотади. Гарчи мазкур саҳифага қарийб 250 минг киши обуна бўлган бўлса-да, хабарни тасдиқланган деб бўлмайди.
Эътиборли жиҳати, сўнгги йилларда ташкилотчилар «Олтин тўп» ғолибига натижани олдиндан маълум қилиш амалиётидан воз кечган. Илгари ғолиб тақдирлаш маросимидан аввалоқ ўз ютуғидан хабардор бўлар, у билан интервью ва янги фотосуратлар тайёрланар, улар маросимдан кейин дарҳол France Football журналида эълон қилинарди. Аммо бундай тартиб ғолибнинг исми матбуотга олдиндан сизиб чиқишига сабаб бўлган.
Шу боис сўнгги йилларда ташкилотчилар сирни охирги лаҳзага қадар сақлашга ҳаракат қилмоқда.
