"Real" hujumchisi Vinisius Junior klub bilan yangi shartnoma borasidagi muzokaralar haqidagi savolga javob berdi.
"Ular menga hali hech narsa demadilar. Men juda xotirjamman, shartnomam yakunlanishiga hali uzoq vaqt bor. Albatta, men yangi shartnoma imzolamoqchiman. "Real"da uzoq vaqt qolishni juda xohlayman, lekin bu shoshqaloqlik bilan hal qilinadigan ish emas.
Yangi shartnomani qachon imzolashim va qancha maosh olishim muhim emas. Eng muhimi, dunyoning eng yaxshi klubida o‘ynaganimdan qoniqishimdir" - dedi Vinisius.
Braziliyalik futbolchining klub bilan amaldagi shartnomasi 2024 yilda yakuniga etadi. Oldinroq, yangi shartnomaga ko‘ra, braziliyalik 10 million yevroga yaqin pul olishi xabar qilingandi.
Vinisius ushbu mavsumda "qaymoqranglilar" safida 14ta o‘yin o‘tkazib, 9 gol urdi va 5ta golli uzatmani amalga oshirdi.
