Toshkentda davom etayotgan og‘ir atletika bo‘yicha jahon chempionati bugun muxlislarga cheksiz quvonch ulashdi.

Xabaringiz bor, biroz oldin -67 kg vazn toifasida Doston Yoqubov jahon chempionligini qo‘lga kiritdi. Yurtdoshimiz g‘alabadan so‘ng o‘z taassurotlari bilan o‘rtoqlashdi.

«Avvalo, shunday sharoitlar yaratib berilgani uchun Prezidentimizga rahmat aytaman. Qolaversa, Turizm va sport vazirligiga, Olimpiya milliy qo‘mitasi, Milliy gvardiya, Kasaba uyushmalari federasiyasiga rahmat aytaman.

O‘zbekiston og‘ir atletika federasiyasiga alohida tashakkur deyman. Meni shu yerda qo‘llab turgan muxlislarga va doimo yonimda bo‘ladigan oila a’zolarimga rahmat aytaman.

Shuningdek, Shaxrillo aka Mahmudovga, Farxod aka Mirzajonov, Bahrom aka Abdumalikovga, Bahrom aka Mendiboyev, Jo‘ra aka Zoirov va Obid aka Muslimovga o‘z minnatdorchiligimni bildiraman.

Musobaqa qizg‘in kurashlarga boy bo‘ldi. Hamyurtlarimiz ko‘z o‘ngida bo‘lgani uchun ham xayajon juda kuchli. Xudo xohlasa, bu boshlanishi va keyingi musobaqalarda yanada yaxshiroq natijalar, oltin medal va rekordlar bilan yurtimiz bayrog‘ini baland ko‘tarishga, hamyurtlarimizni xursand qilishga harakat qilaman.

Ushbu musobaqaga Turkiya va Ukraina davlatlarida o‘quv-mashg‘ulot yig‘inlari orqali tayyorlandik. Mashg‘ulotlarda dast ko‘tarish bo‘yicha natijalarimni yaxshilashga erishdik. Bunda murabbiylarimning xizmati katta, ularga yana bir bor rahmat.

Adham Olimpiadadan keyin ko‘p vaqt o‘tmadi. Shuning uchun ham u bu musobaqaga optimal sport formasida yetib kela olmadi, ammo bunga qaramay, u zo‘r ishtirok etdi deya olaman. Dast ko‘tarishda biroz omadi kelmadi. Siltab ko‘tarishda esa o‘z darajasini yana bir bor ko‘rsatib, shohsupadan joy egalladi.

Menimcha, shu vaznda qolaman. Endi hammasini vaqt ko‘rsatadi va nima bo‘lganda ham murabbiylarim bilan maslahatlashgan holda bir qarorga kelamiz», — deydi Yoqubov.