Тошкентда давом этаётган оғир атлетика бўйича жаҳон чемпионати бугун мухлисларга чексиз қувонч улашди.

Хабарингиз бор, бироз олдин -67 кг вазн тоифасида Достон Ёқубов жаҳон чемпионлигини қўлга киритди. Юртдошимиз ғалабадан сўнг ўз таассуротлари билан ўртоқлашди.

«Аввало, шундай шароитлар яратиб берилгани учун Президентимизга раҳмат айтаман. Қолаверса, Туризм ва спорт вазирлигига, Олимпия миллий қўмитаси, Миллий гвардия, Касаба уюшмалари федерациясига раҳмат айтаман.

Ўзбекистон оғир атлетика федерациясига алоҳида ташаккур дейман. Мени шу ерда қўллаб турган мухлисларга ва доимо ёнимда бўладиган оила аъзоларимга раҳмат айтаман.

Шунингдек, Шахрилло ака Маҳмудовга, Фарход ака Мирзажонов, Баҳром ака Абдумаликовга, Баҳром ака Мендибоев, Жўра ака Зоиров ва Обид ака Муслимовга ўз миннатдорчилигимни билдираман.

Мусобақа қизғин курашларга бой бўлди. Ҳамюртларимиз кўз ўнгида бўлгани учун ҳам хаяжон жуда кучли. Худо хоҳласа, бу бошланиши ва кейинги мусобақаларда янада яхшироқ натижалар, олтин медаль ва рекордлар билан юртимиз байроғини баланд кўтаришга, ҳамюртларимизни хурсанд қилишга ҳаракат қиламан.

Ушбу мусобақага Туркия ва Украина давлатларида ўқув-машғулот йиғинлари орқали тайёрландик. Машғулотларда даст кўтариш бўйича натижаларимни яхшилашга эришдик. Бунда мураббийларимнинг хизмати катта, уларга яна бир бор раҳмат.

Адҳам Олимпиададан кейин кўп вақт ўтмади. Шунинг учун ҳам у бу мусобақага оптимал спорт формасида етиб кела олмади, аммо бунга қарамай, у зўр иштирок этди дея оламан. Даст кўтаришда бироз омади келмади. Силтаб кўтаришда эса ўз даражасини яна бир бор кўрсатиб, шоҳсупадан жой эгаллади.

Менимча, шу вазнда қоламан. Энди ҳаммасини вақт кўрсатади ва нима бўлганда ҳам мураббийларим билан маслаҳатлашган ҳолда бир қарорга келамиз», — дейди Ёқубов.