«ПСЖ» ва «Барселона» ўртасида футболчилар алмашинуви амалга ошиши мумкин.
Сўнгги кунларда матбуотда «Барселона» «ПСЖ» ярим ҳимоячиси Фабиан Руисга қизиқиш билдираётгани ҳақида хабарлар тарқалган эди. Манбаларга кўра, испаниялик футболчининг ўзи ҳам ватанига қайтишни истамоқда.
El Nacional нашри RMC Sport маълумотига таяниб хабар беришича, «ПСЖ» президенти Носир Ал-Хелаифий ва бош мураббий Луис Энрике «Барселона»нинг Руисга бўлган қизиқишидан хабардор ва алмашинув вариантини кўриб чиқмоқда.
Париж клуби тажрибали ярим ҳимоячини «Барселона»га қўйиб юборишга тайёр, аммо бунинг эвазига Марк Берналь «ПСЖ» сафига ўтиши керак бўлади.
Қайд этилишича, Луис Энрикега 19 ёшли Бернальнинг ўйини маъқул. Айни пайтда ёш футболчининг «Барселона»даги ўйин амалиёти чекланган.
