Испания терма жамоаси бош мураббийи Луис де ла Фуэнте "Барселона" ўз сафидаги жаҳон чемпионларини махсус маросим билан тақдирламаганидан афсусда эканини билдирди.

Ёзда каталонияликлар Испания терма жамоаси сафида жаҳон чемпиони бўлган футболчилар шарафига анъанавий тақдирлаш маросимини ўтказишдан воз кечган эди.

Испаниянинг чемпион таркибида Ламин Ямал, Родри, Педри, Пау Кубарси, Дани Ольмо, Жоан Гарсия, Эрик Гарсия ва Гави иштирок этган.

"Бундан афсусдаман, чунки бундай эътироф ҳар доим ҳам насиб этавермайди. Улар барибир бу муваффақиятни яхши ҳис қилаётган бўлса керак, чунки қаерга боришмасин, уларни тақдирлашяпти.

Агар сени ўз уйингда эътироф этишмаса, буни бошқа жойда қилишади", — дея де ла Фуэнтенинг сўзларини AS келтирди.

Кейинчалик Испания терма жамоаси футболчиларини бошқа клублар ҳам табриклади. Хусусан, "Эльче" "Барселона"га қарши ўйин олдидан махсус маросим ташкил қилди. Кейин "Леванте" ҳам футболчиларни тақдирлаб, уларга эсдалик совғаларини топширди.