Португалия футбол федерацияси (FPF) президенти Педру Проэнса миллий терма жамоа ҳужумчиси Криштиану Роналду билан боғлиқ вазият юзасидан баёнот берди.

"Биз барчамиз музокаралар столи атрофида ўтирибмиз. Сардоримизни терма жамоага қайтариш истаги жуда кучли.

Одатдаги интизомий жараён ўтказилади. Мустақил органлар вазиятга баҳо беради.

Айни пайтда, энг аввало, Португалия футбол федерацияси томонидан сардоримизни имкон қадар тезроқ қайтариш истаги мавжудлигини кўриб турибмиз.

Бу истакни миллий терма жамоамиз бош мураббийи ҳам билдирган. У сардоримиз майдонга тушишга тайёр экан, биз билан бирга бўлишини айтди.

Шундай экан, ҳозир барчани хотиржамликка ва вазиятга босиқлик билан ёндашишга чақириш вақти келди.

Биз ўз ишимизни бажаряпмиз, чунки бу барчамизнинг умумий истагимиз", — дея Проэнсанинг сўзларини келтиради Record нашри.

Эслатиб ўтамиз, Роналду Миллатлар лигасининг 3-турида Данияга қарши ўтказилган учрашув (4:2) олдидан Португалия терма жамоаси қароргоҳини тарк этган эди.

Бу ҳолат бош мураббий Жорже Жезуш жамоада ҳеч қандай можаро йўқлигини таъкидлаганига қарамай содир бўлган.