«Манчестер Юнайтед»нинг собиқ бош мураббийи Уле-Гуннар Сульшер клубга қайтиш учун махсус шартлар қўйгани ҳақидаги хабарларни инкор этди.
Рубен Аморим истеъфосидан сўнг норвегиялик мутахассиснинг номи «МЮ» билан боғланган, аммо клуб бош мураббийликка Майкл Кэррикни тайинлаган эди.
«Бу гаплар мутлақо сафсата! Жейсон Уилкокс ва Умар Беррада билан яхши суҳбатлашдик. Шартнома муддати ёки бошқа талаблар ҳақида умуман гаплашмадик.
Клубга керак бўлсам, ёрдам беришга тайёр эдим. Жамоа вазиятни яхшилаши учун нималар қилиш лозимлиги ҳақида фикримни билдирдим, холос. Ҳеч қандай музокара бўлмаган», — деди Сульшер TV 2 нашрига.
Норвегиялик мутахассис Кэррикнинг имкониятларига ҳам ишонч билдирди.
«Майкл клубни олдинга олиб чиқиш учун зарур фазилатларга эга. Менимча, у тўғри танлов. Кэррик клубни, мухлисларни ва уларга нима кераклигини яхши тушунади», — деди у.
Эслатиб ўтамиз, Сульшер аввал «Манчестер Юнайтед»ни бошқарган ва 2021 йил ноябрида ўз лавозимини тарк этган.
