Dunyoda shunday futbolchilar borki, ular o‘z faoliyati davomida faqatgina bitta klub sharafini himoya qilgan. Ha, tarixda bunday futbolchilar ko‘p emas, ammo mavjud. Shunday taqdir egalari qatorida Paolo Maldini hamda Xavyer Sanetti ham bor. Ushbu futbolchilar faoliyatini raqamlardan o‘qib olishingiz mumkin: Maldini «Milan» safida 902 marta maydonga tushgan. Sanetti esa «Inter»da 858 bor o‘yinlar qatnashchisiga aylangan. Ikki himoyachi o‘z vaqtida derbi bahslarida jamoasining suyanchiga aylanardi. Har biri bir shaharning ikki ulug‘ klubining sharafini himoya qilib keldi. Shu o‘rinda savol tug‘iladi: bu ikki fenomenning qay biri yaxshiroq bo‘lgan, qay birining yo‘li buyukroq? Quyida ushbu savollarga bir nechta aspketlardan nazar solib ko‘ramiz.
1. Taktik moslashuvchanlik
Umuman olganda, har ikki raqib maydonning turli xil o‘rinlarida o‘ynash qobiliyatiga ega bo‘lgan. Xususan, Paolo Maldini himoyada uchtalik yoki to‘rttalik taktik sxemada asosan qanotni himoya qilgan. Ammo vaqti kelsa, markaziy mudofaa uchun ham turib bera olgan.
Xavyer Sanetti esa o‘zining yaxshiroq moslashuvchanligi bilan ajralib turardi. U himoyaning markazida, har ikki qanotida, yarim himoyaning markazida yoki qanotida harakat qila olgan. Albatta, murabbiy g‘oyasidan kelib chiqib, Sanetti istalgan nuqtaga joylashishi mumkin edi. Bu darajadagi futbolchilar kamyob. Shuning uchun bu bob Sanettiga tegishli. Demak, g‘olib – Sanetti.
2. Derbidagi natijalar
Sanetti va Maldinini solishtirishni, ularning derbidagi natijalariga qaramasdan amalga oshirish imkonsiz ish. Biz ham bu jihatga alohida e’tibor qaratdik. Bu juftlik Milan derbilarida qatnashish borasida mutlaq rekordchi sanaladi. Maldini 56 ta o‘yin bilan nisbatan yetakchi bo‘lsa, Sanetti 47 ta uchrashuv o‘tkazib, ikkinchi o‘ringa joylashgan. Ularning har biri, derbini ko‘p bor yutgan. Lekin Maldinida tosh bosadigan natija borki, uni bu borada g‘olib deb bilishga majbur qiladi. Bu bir paytlar YECHL yarim finalida «Inter» ustidan qozonilgan g‘alaba edi. Shu sababdan Maldini Sanettidan ustundir.
3. Himoyaviy harakatlar
Oldindan aytib qo‘ya qolamiz, bu kategoriyani ham Maldini oladi. Negaki, u yaxshiroq ixtisoslashgan futbolchilar toifasiga kiradi. «Milan» afsonasining himoyaviy sifatlari juda ham kuchli edi. U chapta o‘ynaydimi yoki markazda, har qanday hujumchi uchun qalqon vazifasini o‘tay olgan. Maldinining o‘yinni o‘qiy olishi, raqiblarga qarshi kuchli tajovuzkorligi hamda havodagi muvaffaqiyatli harakati, uni mukammallik sari yetaklagan. Shu boisdan Paolo Maldinini g‘olib deb e’lon qilamiz.
4. Hujumkorlik
Maydonning raqib tomonida, Sanetti jamoasi uchun foydaliroq bo‘lgan. Bu degani, Maldini hujumlarda qatnashmagan, faqat mudofaada yurganini anglatmaydi. Biroq, Sanetti raqib darvozasi oldida yaxshiroq harakat qilar, sovuqqon va tabtortmas edi. Uning hujumchilar bilan bog‘lanishi ham yaxshiroq kechgan. Bu jihatdan olib qaraganda, Sanetti hozirgi, zamonaviy qanot himoyachilariga o‘xshaydi. Xavyer o‘z hujumchi sheriklarini oldinga boshlar, jarima maydonchasiga to‘pni o‘ta qulay va mos ravishda yetkazib berardi. Uning hujumni qo‘llab-quvvatlashini Maldininikiga tenglashtirib bo‘lmaydi. Shunday ekan, bu jihatda Sanetti ustunroq.
ingliz tilidan Jaloliddin ISMATOV tarjimasi
