Angliya chempionatining 25-turidan o‘rin olgan «MYU» - «Sautgempton» uchrashuvi tugashiga 5 daqiqa qolganda, Rangnik Skott Maktominey o‘rniga Elangani maydonga tushirdi.

Albatta, agar yosh hujumchi gol urganida, boshqa gap, ammo umuman ushbu almashtirishning mazmuni turli savollar tug‘diradi.

Masalan, "MYU" yarim himoyasida Maktominey - Pogba - Brunu uchligi o‘rin olgandi. Uchlikda faqat Skott himoya uchun ko‘proq javobgar, uning faolligi Brunu va Pogba kabi kreativ futbolchilarning erkin harakatlanishini ta’minlardi.

Skott - Elanga rokirovkasi natijasida sxema 4-3-3 dan 4-2-4 ga o‘zgardi va endi Pogba - Bruno juftligi hujumlarni boshlashdan tashqari, tayanch zonasiga javobgar bo‘lib qolishdi.

To‘g‘ri, Maktomineyning sariq kartochkasi bor edi va xavf ostida qolgandi. Zaxirada esa, to‘g‘ridan to‘g‘ri nomzod yo‘q, uchta himoyachi — Mata, Gannibal va Lingard bor xolos. Balkim, uchinchi markaziy himoyachini tushirib, maydon markazisiz o‘ynash iloji yo‘qmidi?

Agar «Sautgempton» butun jamoa bo‘lib himoyaga yotib olganida, o‘zgarish o‘zini oqlar, baribir himoya liniyasi baland bo‘lganidan,  Pogba&Brunu raqib jarima maydoniga yaqin joylashishlari mumkin bo‘lib, hujumda qo‘shimcha kuch xalaqit bermasdi.

Ammo «Sautgempton» juda yaxshi kontro‘yin namoyish qilib, to‘p nazoratida ham bo‘sh kelmayotgan va tez-tez xavfli vaziyatlar yaratayotgandi. Bunday sharoitda to‘psiz o‘yinda intizomli bo‘lmagan juftlikka eng muhim zonani topshirish katta risk.

Ikkinchidan, buning natijasida har ikki futbolchi ham oldinga chiqishda qo‘rqib qolishdi, zero raqib jarima maydonida to‘pni nazorat qilishda eng muhim o‘yinchilar aynan shu ikkisi.

Hujumda qo‘shimcha Elanganing yugurib yurishidan ko‘ra, Pogba va Brunoning erkinroq bo‘lishlari yanada foydaliroq bo‘lardi, menimcha.

Qahramon Aslanov.