Avval xabar berganimizdek, O‘FA hamda O‘zbekiston davlat jismoniy tarbiya va sport universiteti o‘rtasida o‘zaro hamkorlikni yo‘lga qo‘yish to‘g‘risida memorandum imzolangandi. Unga ko‘ra, universitet talabalaridan yuqori iqtidorga ega bo‘lgan yosh futbolchilarni tanlash, saralab olish va ularni professional sportchilar sifatida tayyorlash tizimini yo‘lga qo‘yish, xalqaro talab va standartlar asosida futbol bo‘yicha mutaxassislarni tayyorlash borasida yaqindan hamkorlik qilish belgilangandi.

Bugun O‘zbekiston davlat jismoniy tarbiya va sport universiteti huzuridagi ilmiy kengashning navbatdagi yig‘ilishi shu mavzuga bag‘ishlandi.

“Har bir sohada bo‘lganidek, hakamlikda ham bugungi kunning talabi — ishga mas’uliyat va professionallik bilan yondashish, zamonaviy bilimlarni egallashda shijoatli bo‘lish hisoblanadi. Avval faqat o‘yindagi vaziyatlar tahlil qilingan bo‘lsa, bugungi kunda hakamlarning jismoniy tayyorgarligiga alohida e’tibor qaratiladi. Uchrashuv davomida barcha holatlarni nazorat qilish, tahlil etish, qaror chiqarishdagi tajribani oshirishga ilmiy yondoshiladi. Bu borada zamonaviy texnologiyalarni ishga solish yo‘lga qo‘yiladi”, dedi Ravshan Ermatov.

Hakamlar bilan o‘tkaziladigan seminarlarga professor o‘qituvchilar va mutaxassislar taklif etiladi. Shuningdek, universitetning salohiyatli talabalarini hakamlik, tahlilchi, marketing, skauting, psixologiya kabi futbolning ko‘plab yo‘nalishlariga jalb etish borasida kelishuvga erishildi.