Аввал хабар берганимиздек, ЎФА ҳамда Ўзбекистон давлат жисмоний тарбия ва спорт университети ўртасида ўзаро ҳамкорликни йўлга қўйиш тўғрисида меморандум имзоланганди. Унга кўра, университет талабаларидан юқори иқтидорга эга бўлган ёш футболчиларни танлаш, саралаб олиш ва уларни профессионал спортчилар сифатида тайёрлаш тизимини йўлга қўйиш, халқаро талаб ва стандартлар асосида футбол бўйича мутахассисларни тайёрлаш борасида яқиндан ҳамкорлик қилиш белгиланганди.
Бугун Ўзбекистон давлат жисмоний тарбия ва спорт университети ҳузуридаги илмий кенгашнинг навбатдаги йиғилиши шу мавзуга бағишланди.
“Ҳар бир соҳада бўлганидек, ҳакамликда ҳам бугунги куннинг талаби — ишга масъулият ва профессионаллик билан ёндашиш, замонавий билимларни эгаллашда шижоатли бўлиш ҳисобланади. Аввал фақат ўйиндаги вазиятлар таҳлил қилинган бўлса, бугунги кунда ҳакамларнинг жисмоний тайёргарлигига алоҳида эътибор қаратилади. Учрашув давомида барча ҳолатларни назорат қилиш, таҳлил этиш, қарор чиқаришдаги тажрибани оширишга илмий ёндошилади. Бу борада замонавий технологияларни ишга солиш йўлга қўйилади”, деди Равшан Эрматов.
Ҳакамлар билан ўтказиладиган семинарларга профессор ўқитувчилар ва мутахассислар таклиф этилади. Шунингдек, университетнинг салоҳиятли талабаларини ҳакамлик, таҳлилчи, маркетинг, скаутинг, психология каби футболнинг кўплаб йўналишларига жалб этиш борасида келишувга эришилди.