Osiyo futbol konfederasiyasi o‘tgan yildan e’tiboran qit’ada ayollar futbolini rivojlantirish bo‘yicha bir qator loyihalarni amalga oshirmoqda.
Xususan, o‘tgan yili qit’a bo‘yicha ilk bora ayollar jamoalari ham sinov tariqasida lisenziyalashdan o‘tkazildi. O‘zbekiston Professional futbol ligasi kam sonli a’zo mamlakatlar qatorida ayollar klublarini ham lisenziyalash jarayoniga jalb etdi.
Yakunda “So‘g‘diyona-W” hamda “Bunyodkor-W” Osiyo bo‘yicha eng birinchi ayollar jamoalaridan bo‘lib OFK lisenziyasiga ega chiqishdi.
2022 yildan e’tiboran mazkur jarayon barcha qolgan a’zo davlatlarda ham majburiy tartibda tatbiq etiladi. 2023 yilda ayollar jamoalari o‘rtasida ilk na’munaviy 8 ta klub ishtirokida Osiyo Chempionlar ligasi tashkil qilinsa, 2024 yildan e’tiboran ayollar jamoalari uchun to‘laqonli OCHLga start beriladi va unda faqat lisenziya olgan klublargina ishtirok etadi.
