O‘zbekiston chempionatining 4-turidan o‘rin olgan qiziqarli uchrashuvlardan biri Jizzaxda bo‘lib o‘tdi. OFK kubogida ishtirok etadigan "So‘g‘diyona" o‘z maydonida musobaqa debyutanti "Olimpik"ni qabul qildi.

Jizzaxliklar bir soat davomida katta ustunlikka erishishgan bo‘lsa, olimpiyachilar asosan himoyalanishdi. Baqoyev jamoasi birinchi bo‘limda hisobni ochgandi, ammo gol ofsayd tufayli (VAR yordamida) bekor qilindi.

Ikkinchi bo‘limning 58-daqiqasida mezbonlar futbolchisi maydon markazida raqibiga nisbatan fol ishlatgani uchun ikkinchi sariq kartochkani oldi va maydonni tark etdi. "Olimpik" son jihatdan ustunlikdan 78-daqiqada foydalanishdi. Darvoza to‘siniga tegib qaytgan to‘pni Otabek Jo‘raqo‘ziyev bosh bilan darvozaga joylab qo‘ydi.

Toshkentliklar 90-daqiqada o‘yin taqdirini hal qilib qo‘yishlari mumkin edi. Darvozabon to‘pni egallab, maydon markazi tomon uloqtirib berdi. Mamasiddiqov "So‘g‘diyona" posboni bilan yakkama-yakka vaziyatga chiqib bordi va zarba berdi. To‘p ustunga tegib qaytdi.

Uchrashuvga qo‘shib berilgan 3-daqiqada hakam "Olimpik" darvozasi tomon penalti belgiladi. Sabab — to‘p himoyachining qo‘liga tegdi. Penaltidan esa Shohruz Norxonov unumli foydalanib, hisobni tenglashtirdi.

Natijada har ikki jamoa 2 ochko yo‘qotishdi. Ayniqsa, "Olimpik" mavsumdagi ilk g‘alabasiga yaqin turgandi.

Superliga. 4-tur
"SO‘G‘DIYONA" - "OLIMPIK" - 1:1 (0:0)
Gollar: Shohruz Norxonov (90+3-penalti) — Otabek Jo‘raqo‘ziyev (78)
Chetlatish: Behruz Shodmonov (58)
So‘g‘diyona: Mitrovich, Qulmatov (Filiposyan 64), No‘monov, Shayqulov, Jo‘rabekov, Norxonov, Qahramonov, Shodmonov, Chermel, Abdumannopov (Hasanov 60), Kolakovich.
Olimpik: Nazarov, Begimov, Hamraliyev, Jiyanov, Abdumannonov (Odilov 46), Jo‘raqo‘ziyev, Tursunov, Ibrohimov, Tairov, Turdialiyev, Anvarov (Mamasiddiqov 46).