Ўзбекистон чемпионатининг 4-туридан ўрин олган қизиқарли учрашувлардан бири Жиззахда бўлиб ўтди. ОФК кубогида иштирок этадиган "Сўғдиёна" ўз майдонида мусобақа дебютанти "Олимпик"ни қабул қилди.

Жиззахликлар бир соат давомида катта устунликка эришишган бўлса, олимпиячилар асосан ҳимояланишди. Бақоев жамоаси биринчи бўлимда ҳисобни очганди, аммо гол офсайд туфайли (VAR ёрдамида) бекор қилинди.

Иккинчи бўлимнинг 58-дақиқасида мезбонлар футболчиси майдон марказида рақибига нисбатан фол ишлатгани учун иккинчи сариқ карточкани олди ва майдонни тарк этди. "Олимпик" сон жиҳатдан устунликдан 78-дақиқада фойдаланишди. Дарвоза тўсинига тегиб қайтган тўпни Отабек Жўрақўзиев бош билан дарвозага жойлаб қўйди.

Тошкентликлар 90-дақиқада ўйин тақдирини ҳал қилиб қўйишлари мумкин эди. Дарвозабон тўпни эгаллаб, майдон маркази томон улоқтириб берди. Мамасиддиқов "Сўғдиёна" посбони билан яккама-якка вазиятга чиқиб борди ва зарба берди. Тўп устунга тегиб қайтди.

Учрашувга қўшиб берилган 3-дақиқада ҳакам "Олимпик" дарвозаси томон пенальти белгилади. Сабаб — тўп ҳимоячининг қўлига тегди. Пенальтидан эса Шоҳруз Норхонов унумли фойдаланиб, ҳисобни тенглаштирди.

Натижада ҳар икки жамоа 2 очко йўқотишди. Айниқса, "Олимпик" мавсумдаги илк ғалабасига яқин турганди.

Суперлига. 4-тур
"СЎҒДИЁНА" - "ОЛИМПИК" - 1:1 (0:0)
Голлар: Шоҳруз Норхонов (90+3-пенальти) — Отабек Жўрақўзиев (78)
Четлатиш: Беҳруз Шодмонов (58)
Сўғдиёна: Митрович, Қулматов (Филипосян 64), Нўмонов, Шайқулов, Жўрабеков, Норхонов, Қаҳрамонов, Шодмонов, Чермель, Абдуманнопов (Ҳасанов 60), Колакович.
Олимпик: Назаров, Бегимов, Ҳамралиев, Жиянов, Абдуманнонов (Одилов 46), Жўрақўзиев, Турсунов, Иброҳимов, Таиров, Турдиалиев, Анваров (Мамасиддиқов 46).