Ҳужумчи Ферран Торрес «ПСЖ»га трансфери расман эълон қилингач, «Барселона» ишқибозлари билан хайрлашди.

«Барса» мухлислари, авваламбор, барчаси учун сизларга миннатдорчилик билдирмоқчиман. Ушбу либосни кийиш мен учун жуда катта фахр эди. Охирги 4,5 йил давомида «Барса»да бошдан кечирганларим мени ҳам футболчи, ҳам инсон сифатида янада яхшироқ бўлишимга ёрдам берди.

Бу вақт ичида «Барселона» менинг уйимга айланди. Мен бу ерга бор кучимни бериш ваъдаси билан келгандим ва айнан шунга интилдим. Мақсадим ҳамиша жамоага ёрдам бериш ва «Барса»ни ўзи лойиқ бўлган жойга — чўққига қайтариш эди.

Ушбу клубда мен ҳам кийиниш хонасида, ҳам ундан ташқарида кўплаб дўстлар ва бизни янада яхшироқ қилган инсонларни қолдирмоқдаман. Биз «Барса» билан биргаликда чемпион бўлдик, кўпчилигимиз терма жамоа билан ҳам зафар қучдик. Раҳмат!», — деб ёзди Торрес ижтимоий тармоқдаги саҳифасида.

Эслатиб ўтамиз, Торрес 2022 йилнинг январидан бери каталонияликлар сафида тўп суриб келаётган эди. У «кўк-анорранглилар» либосида барча турнирларда 207 та ўйинда майдонга тушиб, 65 та гол урган ва 23 та голли узатмага муаллифлик қилган. Жамоа билан биргаликда у 3 марта Испания чемпиони, 3 марта Испания Суперкубоги ҳамда мамлакат кубоги соҳибига айланди.