"Барселона" ҳужум чизиғини кучайтириш учун асосий номзод сифатида "Атлетико" форварди Хулиан Альваресни кўришда давом этмоқда. Бироқ Мадрид клубининг аргентиналикни сотишни истамаётгани каталонияликларни муқобил вариантлар устида ҳам ишлашга мажбур қилмоқда. Диего Симеоне ҳам Альваресга янги мавсумда ишонишини билдирган.
Сўнгги хабарларга кўра, "Барселона" рўйхатидаги вариантлардан бири "Вильярреал" ҳужумчиси Жорж Микаутадзе. Каталонияликлар грузиялик футболчининг атрофи билан алоқага чиққан, Микаутадзе эса трансферга ижобий муносабат билдирган. "Вильярреал" уни тахминан 60 миллион еврога баҳолаётгани айтилмоқда.
Шунингдек, "Интер" ҳужумчиси Лаутаро Мартинес, "Бенфика" форварди Вангелис Павлидис ва "Реал Сосьедад" етакчиси Микель Оярсабаль ҳам муҳокама қилинган номлар қаторида. Бироқ уларнинг ҳар бири бўйича трансферни амалга оширишда молиявий ёки спортга оид қийинчиликлар мавжуд.
"Спортинг"нинг колумбиялик ҳужумчиси Луис Суарес ҳам Альваресга асосий муқобиллардан бири сифатида кўрилган эди. Португалия клуби футболчининг 80 миллион евролик товон пулидан чекинишни истамаётгани сабаб "Барселона" бу вариантдан воз кечгани хабар қилинди.
Аввалроқ Жоау Педро, Эли Жуниор Крупи ва Душан Влахович номлари ҳам каталонияликлар рўйхатида тилга олинган. Ҳозирча эса клубнинг биринчи танлови Альварес бўлиб қолмоқда ва якуний қарор трансфер ойнасининг сўнгги қисмида қабул қилиниши кутилмоқда.
