«Барселона» спорт директори Деку жамоанинг амалдаги бош мураббийи Ханс-Дитер Фликнинг келажакдаги эҳтимолий ворислари рўйхатига яна бир номзодни қўшди.
Каталония клуби ҳозирда немис мутахассисининг фаолиятидан мамнун. Бироқ раҳбарият узоқ муддатли режаларни ҳам ишлаб чиқмоқда ва Флик билан ҳамкорлик якунланган тақдирда унинг ўрнини ким эгаллаши мумкинлигини ўрганмоқда.
Аввалроқ «Барселона» бош мураббийлигига Сеск Фабрегас ва Луис Энрике номзодлари боғланган эди.
El Nacional нашрининг хабар беришича, Деку ушбу рўйхатга клубнинг собиқ ярим ҳимоячиси Серхио Бускетсни ҳам киритган.
Португалиялик функционер Бускетсда юқори савияли мураббийга айланиш учун зарур салоҳият бор деб ҳисобламоқда.
Эслатиб ўтамиз, Серхио жорий йил ёзида «Барселона»нинг захира жамоасида мураббий ёрдамчиси сифатида иш бошлаган эди.
«Бускетснинг клуб тизими ичида мураббий сифатида ўсишини бевосита кузатиш имконияти Деку учун катта устунлик ҳисобланади.
Бу орқали у Серхионинг иш услубини, футболчилар билан қандай мулоқот ўрнатишини ва уларнинг мураббий кўрсатмаларига муносабатини баҳолай олади», — дейилади нашр хабарида.
Маълумотларга кўра, «Барселона» Бускетсни асосий жамоа бош мураббийлигига тайинлаш имкониятини 2029 йилда кўриб чиқиши мумкин.
Бироқ бу режанинг амалга ошиши собиқ футболчининг захира жамоасида қандай натижалар кўрсатиши ва мураббий сифатида қай даражада ривожланишига боғлиқ бўлади.
