Мадриднинг "Атлетико" клуби бош мураббийи Диего Симеоне Испания чемпионлиги учун кураш ва "Барселона" билан рақобат ҳақида ўз фикрларини билдирди.
Аргентиналик мутахассис Ла Лиганинг 10-туридан ўрин олган "Депортиво"га қарши учрашув олдидан матбуот анжуманида журналистларнинг саволларига жавоб қайтарди.
Симеонедан якшанба куни бўлиб ўтадиган "Реал" ва "Барселона" ўртасидаги "Эль-класико"ни қандай томоша қилиши сўралди.
"Ҳозир мен фақат "Депортиво"га қарши ўйин ҳақида ўйлаяпман", — деди мураббий.
Шундан сўнг журналистлар ундан ҳозирги "Барселона" билан чемпионлик учун рақобатлашиш имконияти ҳақида сўрашди.
"Ҳа, албатта. Ҳар доим рақобатлашиш мумкин. Бу шундоқ ҳам аниқ-ку. Уларнинг жуда кучли жамоага эга экани ҳам бу фикрни ўзгартирмайди", — дея жавоб қайтарди Симеоне.
Бироқ "Атлетико"нинг чемпионликка асосий даъвогарлар қаторида кўрилмаётгани унга қўшимча мотивация берадими, деган саволга мутахассис жавоб беришни истамади.
"Кечирасиз, лекин мен фақат "Депортиво"га қарши учрашув ҳақида гапиришга тайёрман", — деди аргентиналик мураббий.
Эслатиб ўтамиз, "Атлетико" ва "Депортиво" ўртасидаги Ла Лиганинг 10-тур учрашуви 24 октябрь куни Мадриддаги "Сивитас Метрополитано" стадионида бўлиб ўтади.
Баҳс Тошкент вақти билан 25 октябрга ўтар кечаси соат 00:00 да бошланади.
