Саудия Арабистонининг «Ан-Наср» клуби миллий чемпионатларда кетма-кет гол урилган ўйинлар сони бўйича жаҳон рекордини янгилади. Ар-Риёд жамоаси Про-лиганинг 11-турида «Ал-Файсалий» дарвозасини ишғол қилиб, ўз голли сериясини кетма-кет 97 та учрашувга етказди.
Шу тариқа, «Ан-Наср» қарийб 90 йилдан бери сақланиб келаётган Аргентинанинг «Ривер Плейт» клубига тегишли натижадан ўзиб кетди. Аргентина жамоаси 1936–1939 йиллар оралиғида миллий чемпионатнинг кетма-кет 96 та учрашувида гол урган. Айрим манбаларда бу кўрсаткич 94 та деб келтирилган бўлса-да, таниқли футбол статистикачиси Алексис Мартин-Тамайо (MisterChip) 96 та ўйин ҳақида маълумот берган.
Эслатиб ўтамиз, «Ан-Наср» «Ал-Файсалий»га қарши баҳсда 3:1 ҳисобида ғалаба қозонди. Учрашувда Ар-Риёд клуби сардори Криштиану Роналду ҳам гол урди. Бу 41 ёшли португалиялик футболчининг фаолиятидаги 982-голи бўлди.
