Мадриднинг «Реал» клуби дарвозабони Тибо Куртуа Испания чемпионати доирасида «Барселона»га қарши бўлиб ўтадиган навбатдаги «эл-класико» олдидан ўз фикрларини билдирди.

Бельгиялик голкипер Каталония клубига қарши сафар учрашуви осон кечмаслигини тан олди. Шунга қарамай, у жамоасининг ғалаба қозониш имкониятларига ишонч билдирмоқда.

«Бизни қийин учрашув кутиб турибди. Албатта, биз «Барселона»ни мағлуб этишга қодир эканимизни яхши тушунамиз.

Бироқ «эл-класико» ҳар доим ўзига хос баҳс ҳисобланади. У ҳатто Чемпионлар лигасидаги учрашувлардан ҳам фарқ қилади.

Биз майдонга чиқиб, ғалаба қозониш учун бор кучимизни сарфлашимиз ва «Барселона» билан орамиздаги очколар фарқини қисқартиришимиз керак», — деди Куртуа.

«Барселона» ва «Реал» ўртасидаги учрашув 25 октябрь куни «Камп Ноу» стадионида бўлиб ўтади.

Эслатиб ўтамиз, «Барселона» Испания чемпионатининг дастлабки 9 та турида юз фоизлик натижа қайд этиб, барча учрашувларда ғалаба қозонган.

«Реал» эса айни пайтда каталонияликлардан 6 очко ортда қолмоқда.