«ПСЖ» қишки трансферлар ойнасида ҳужум чизиғини кучайтиришни режалаштирмоқда. Парижликлар эътиборига Мадриднинг «Атлетико» клуби ҳужумчиси Хулиан Альварес тушган.
The Touchline нашрининг хабар беришича, Франция гранди аргентиналик футболчини январь ойида ўз сафига қўшиб олиш имкониятини кўриб чиқмоқда.
Бундай қарорга жамоанинг асосий вингерларидан бири Хвича Кварацхелиянинг жиддий жароҳат олиши сабаб бўлган. Грузиялик футболчи шу ҳафта тиззасидан оғир шикастланди ва жарроҳлик амалиётини бошдан кечирди. Унинг тикланиш жараёни узоқ вақт давом этиши кутилмоқда.
«ПСЖ» раҳбарияти юзага келган вазиятда Хулиан Альваресни муносиб вариантлардан бири сифатида кўрмоқда. Аргентиналик футболчининг асосий позицияси марказий ҳужумчи бўлса-да, у ҳужумнинг ҳар икки қанотида ҳам ҳаракат қила олади.
Қайд этиш жоиз, Альварес ўтган ёзда «Барселона»га ўтишни истаган, бироқ «Атлетико» раҳбарияти уни қўйиб юборишдан бош тортган эди.
Transfermarkt портали 26 ёшли аргентиналик ҳужумчининг бозор қийматини 110 миллион еврога баҳоламоқда.
