«ПСЖ» бош мураббийи Луис Энрике жиддий жароҳат туфайли узоқ муддатга сафдан чиққан Хвича Кварацхелиянинг ўрнини тўлдириш учун ноодатий ечимни кўриб чиқмоқда.
L’Equipe нашрининг хабар беришича, испаниялик мутахассис португалиялик чап қанот ҳимоячиси Нуну Мендешни ҳужум чизиғига ўтказишни режалаштирмоқда. Хусусан, футболчидан чап қанот вингери сифатида фойдаланиш имконияти ўрганилмоқда.
Мураббийлар штаби мазкур тактик ўзгариш орқали грузиялик футболчининг узоқ муддат майдонга туша олмаслиги туфайли юзага келган бўшлиқни қисман тўлдиришни мақсад қилган.
Эслатиб ўтамиз, Кварацхелия Чемпионлар лигаси умумий босқичининг 3-турида «Барселона»га қарши ўтказилган ва парижликларнинг 4:2 ҳисобидаги ғалабаси билан якунланган учрашувда оғир жароҳат олган эди.
Тиббий текширувлар натижасида вингернинг тиззасидаги хочсимон бойламлар жиддий шикастлангани аниқланган. Шу сабабли Кварацхелия учун жорий мавсум муддатидан аввал якунланган. Унинг тикланиш жараёни тахминан 9 ой давом этиши кутилмоқда.
