"Барселона" ва "Реал"нинг собиқ футболчиси Луиш Фигу 25 октябрь куни бўлиб ўтадиган "эл-класико" учрашуви қандай натижа билан якунланиши ҳақида ўз тахминини билдирди.
Португалиялик собиқ ярим ҳимоячининг фикрича, Испаниянинг икки гранди ўртасидаги навбатдаги тўқнашувда ғолиб аниқланмайди.
"Тахминим қандай? Мен 2:2 ҳисобини танлайман. Голларни Рафинья, Ямал, Беллингем ва Мбаппе киритади.
"Барселона" ҳужумкор жамоа, улар доимо гол уришади. "Реал" эса қарши ҳужумларда ўз имкониятларини топишига ишонаман.
Мбаппе бўш ҳудуд пайдо бўлганда ўзини жуда яхши намоён қиладиган футболчи. Менимча, унда гол уриш учун имкониятлар бўлади, чунки "Барселона" кўпинча ҳимоя чизиғини юқорида жойлаштиради", — дея Фигунинг сўзларини келтиради Mundo Deportivo нашри.
Эслатиб ўтамиз, Испания чемпионатининг 10-туридан ўрин олган "Барселона" — "Реал" учрашуви 25 октябрь куни бўлиб ўтади.
