«Manchester Siti» yozda kimlarni sotib olishni rejalashtirib oldi. Bu haqda insayder Fabrisio Romano xabar berdi.

Manbaga ko‘ra, birinchi navbatda hujum chizig‘iga nomzodlar ko‘rib chiqilmoqda, chunki argentinalik Serxio Aguero jamoani tark etganidan so‘ng, «shaharliklar» Angliya terma jamoasi hujumchisi Xarri Keynni sotib olish borasida «Tottenxem» bilan kelisha olmagan.

«Siti»ning nomzodlar ro‘yxatida «Yuventus» a’zosi Paulo Dibala va «Atletiko» yetakchisi Joau Feliks bor. Shuningdek, «Borussiya Dortmund» futbolchisi Erling Xoland ingliz klubi ro‘yxatidan joy olgan.

Shuningdek, braziliyalik Fernandinyoning jamoada qolishi noaniq. Shu sabab Manchester klubi yarim himoya markazini yangilashni ham rejalashtirmoqda. Qisqa ro‘yxatda «Vest Xem Yunayted»dan Deklan Rays, «Monako»dan Orelyen Tchameni, «Sporting»dan Mateus Nunyes va «Bolonya»dan Mattias Svnberglar bor.

«Siti»ning yangi o‘yinchiga muhtoj bo‘lgan so‘nggi «muammo» pozisiyasi - chap qanot himoyachisi. «Kristal Pelas» a’zosi Tayrik Mitchell, «Bolonya»dan Aaron Xikki va «Atletiko Paranayense»dan Abner Vinisiuslar nomzod sifatida ko‘rilmoqda.

2021/22 yilgi mavsumda APLda 30 ta o‘yin o‘tkazgan «Manchester Siti» 73 ochko bilan 1-o‘rinda bormoqda. Ikkinchi o‘rindagi «Liverpul»da ochko kam. 10 aprel, yakshanba kuni bu jamoalar o‘zaro o‘yin o‘tkazishadi.