«Манчестер Сити» ёзда кимларни сотиб олишни режалаштириб олди. Бу ҳақда инсайдер Фабрицио Романо хабар берди.

Манбага кўра, биринчи навбатда ҳужум чизиғига номзодлар кўриб чиқилмоқда, чунки аргентиналик Серхио Агуэро жамоани тарк этганидан сўнг, «шаҳарликлар» Англия терма жамоаси ҳужумчиси Харри Кейнни сотиб олиш борасида «Тоттенхэм» билан келиша олмаган.

«Сити»нинг номзодлар рўйхатида «Ювентус» аъзоси Пауло Дибала ва «Атлетико» етакчиси Жоау Феликс бор. Шунингдек, «Боруссия Дортмунд» футболчиси Эрлинг Холанд инглиз клуби рўйхатидан жой олган.

Шунингдек, бразилиялик Фернандиньонинг жамоада қолиши ноаниқ. Шу сабаб Манчестер клуби ярим ҳимоя марказини янгилашни ҳам режалаштирмоқда. Қисқа рўйхатда «Вест Хэм Юнайтед»дан Деклан Райс, «Монако»дан Орельен Тчамени, «Спортинг»дан Матеус Нуньес ва «Болонья»дан Маттиас Свнберглар бор.

«Сити»нинг янги ўйинчига муҳтож бўлган сўнгги «муаммо» позицияси - чап қанот ҳимоячиси. «Кристал Пэлас» аъзоси Тайрик Митчелл, «Болонья»дан Аарон Хикки ва «Атлетико Паранаенсе»дан Абнер Винисиуслар номзод сифатида кўрилмоқда.

2021/22 йилги мавсумда АПЛда 30 та ўйин ўтказган «Манчестер Сити» 73 очко билан 1-ўринда бормоқда. Иккинчи ўриндаги «Ливерпуль»да очко кам. 10 апрель, якшанба куни бу жамоалар ўзаро ўйин ўтказишади.