«Барселона» «Манчестер Сити» ярим ҳимоячиси Родри трансферини якунлаш арафасида турибди.

Mundo Deportivo нашри хабар беришича, клублар ўртасидаги музокаралар ҳал қилувчи босқичга кирган. Каталонияликлар аввалроқ футболчининг ўзи билан шахсий шартнома шартларини тўлиқ келишиб олган.

Энди «Барселона» ва «Манчестер Сити» трансфер қиймати бўйича ҳам келишувга яқин турибди. Кутилаётган битим белгиланган тўлов ҳамда бонусларни ўз ичига олади. Томонларга ҳужжатларни алмашишдан олдин сўнгги тафсилотларни келишиб олиш қолган.

Қайд этилишича, «Барселона» бош мураббийи Ханс-Дитер Флик Родрини жамоа ихтиёрига шу ҳафтанинг ўзида қўшиб олишни режалаштирмоқда.