«Монако» ярим ҳимоячиси Ламин Камара учун «Кристал Пэлас»дан келиб тушган 50 миллион евро миқдоридаги илк расмий таклифни рад этди.

Франция клуби сенегаллик футболчи учун камида 60 миллион евро олишни истамоқда. Айни пайтда «Ливерпуль» ва «Манчестер Юнайтед» ҳам 22 ёшли ярим ҳимоячининг вазиятини кузатиб бормоқда.

«Монако» бош мураббийи Филипе Луис эса Камарани жамоада сақлаб қолиш истагини очиқ билдирди.

«Мен жуда худбинман ва барча футболчиларимни жамоада қолдиришни хоҳлайман. У эҳтимол дунёдаги энг яхши ярим ҳимоячилардан бири», — деди мутахассис.

Филипе Луис Камаранинг тўп билан олдинга ҳаракатланиши ва майдондаги меҳнатсеварлигини алоҳида таъкидлади.

Камара якшанба куни «Ливерпуль»га қарши ўтказилган ўртоқлик учрашувида (3:2) ҳам яхши таассурот қолдирди. У мазкур баҳсда мерсисайдликлар яримҳимоячилари Доминик Собослай ва Райан Гравенберхга қарши ҳаракат қилди.

Ламин Камаранинг «Монако» билан амалдаги шартномаси 2029 йилгача мўлжалланган. Қолаверса, клуб ёзги трансферлар давомида футболчилар сотувидан аллақачон 105 миллион евро ишлаб олган. Шу боис «Монако» Камарани сотишга мажбур эмас ва ўзининг 60 миллион евролик талабида қатъий туриши мумкин.