Futbolda orzular chindan ham ro‘yobga chiqadi - kecha Lionel Messi bilan birga suratga tushishni o‘ylab yurgan, o‘z gollarini xuddi Krishtianu Ronaldu kabi Siiiu usulida nishonlashdan uyalmagan bolakay bugun Argentina milliy jamoasida! Xo‘sh, gap kim haqida ketmoqda?
17 yoshli vinger Alexandro Garnacho yaqindagina, ya’ni mart oyida «MYU» U-18 jamoasining o‘z yosh toifasida Angliya kubogi finaliga chiqishiga katta hissa qo‘shgandi. Aniqrog‘i, argentinalik iqtidorli yigit «Vulverxempton»ga qarshi kechgan va 3:0 hisobida yosh «qizil iblislar» foydasiga hal bo‘lgan bahsda gollardan biriga mualliflik qilib, turnirdagi aniq zarbalari sonini 4taga yetkazib qo‘ydi. U shundan so‘ng birdaniga Argentina milliy jamoasidan chaqiruv oldi. Oddiy aytganda, «albiselestlar» bosh murabbiyi Lionel Skaloni Venesuela va Ekvador termalariga qarshi o‘yinlar (JCH-2022 saralashi)ga tayyorgarlik jarayonida Alexandroni ham amalda sinab ko‘rishni istadi. Qarang-a, yigitcha «MYU»ning asosiy tarkibida hali 1 daqiqa o‘ynamay turib, keng tanlov imkoniga ega Argentina milliy jamoasida paydo bo‘ldi.
Salohiyatli hujumchi «Old Trafford»ga 2020 yilning yozida «Atletiko» akademiyasidan ko‘chib o‘tdi. Garnacho bunga qadar Ispaniyaning turli yosh toifasidagi terma jamoalari safida bir necha marta maydonga tushgan, yaqinda esa fuqaroligini o‘zgartirgandi. U endi o‘z kumiri - Lionel Messi bilan birga o‘ynashi mumkin. Chunonchi, Alexandro ona tomondan aynan argentinalikdir. Mana, 17 yoshli yigitcha ilk mashg‘ulotlardayoq Messi bilan suratga tushdi va uni ijtimoiy tarmoqlarga joylashtirdi. Imzo o‘rnida yozuv ham zo‘r: «Orzular chindan ham, amalga oshadi». Alexandro terma jamoa ixtiyoriga yo‘l olishdan oldin «Yunayted» kanaliga bergan qisqacha intervyusida ham shu haqda gapirgandi: «Bu - men uchun katta sharaf. Ikki mamlakat pasportiga egaligim qo‘shimcha imkoniyat hisoblanadi. Ha, Madridda tug‘ilganman, lekin onam argentinalik. Hozir bag‘oyat xursandman, yana hayajon darajasi baland. Oilamiz har doim ahilligi bilan ajralib turgan. O‘zim bolaligimda har ikki terma jamoani birdek qo‘llab-quvvatlaganman. Yaqinlarim bundan faxrlanadilar, albatta!»
Joriy mavsum Garnacho uchun chindan ham, zo‘r o‘tmoqda. «Yunayted» U-18 jamoasi avvalgi oy Angliya yoshlar kubogi doirasida «Everton»ni 4:1 hisobida yengganida, qahramonimiz raqibni aldab o‘tish asnosida urgan golini Krishtianu Ronalduga xos xatti-harakat bilan nishonladi - «Old Trafford»da yana Siiiu...
A.AHMEDOV tayyorladi
