Denis Undavni bilasizmi? Belgiyaning «Union» klubi sharafini himoya qilayotgan bu yigit joriy mavsum jahon milliy chempionatlarida «gol+pas» tizimi bo‘yicha ochko jamg‘arish borasida Karim Benzemadan ham qolishayotgani yo‘q. Demak, quyida championat.com sayti ma’lumotlari asosida bu boradagi reytingning yuqori qismiga nazar solamiz. Avvalo, e’tiborga oling: futbolchilarning faqat milliy chempionatlardagi statistik natijalari hisobga olingan. Shuningdek, reyting ligalarning 8-11 aprel kunlariga to‘g‘ri kelgan oxirgi tur o‘yinlaridan oldin tuzilgan.

1. Germaniyalik turk Denis Undav Belgiya Yupiler-ligasini shunchaki, «yondirmoqda». Samarador futbolchiga da’vogarlar orasida «Brayton» ildamroq harakat qilib, yanvarda transferni rasmiylashtirdi (atigi 7 million yevro evaziga). To‘g‘ri, inglizlar Undavni yozgacha «Union»da qoldirishni ma’qul topishdi. Hozirda Belgiya chempionati to‘purarlar poygasida Denisga «Antverpen»ning shveysariyalik hujumkor futbolchisi Mixael Fray (22ta gol) bosim o‘tkazmoqda.

2. Sardor, yetakchi va shunchaki, «Real»ning joriy mavsumdagi eng yaxshi futbolchisi. Karim Benzemaga boshqa ta’riflar ortiqcha. Fransiya­lik hujumchi oxirgi «El-klasiko»da maydonga tushmadi va «Real» o‘z maydonida «Barselona»ga 0:4 hisobida yengildi. Shu faktning o‘zi ko‘p narsadan dalolat bermoqda.

3. «Futbolda 30 yoshdan ke­yin ham hayot bor» — bu faxriy Nemanya Bilbiya xitobi. 31 yoshni urib qo‘ygan hujumchi hozir faoliyatidagi eng yaxshi mavsumni o‘tkazmoqda. «Zrinski Mostar» chempionlik sari odimlamoqda, bunda qatorasiga 14ta o‘yinda gol urgan Nemanyaning ulushi katta. Diqqat qiling, u 26 sentabrdan buyon naq 22ta gol urdi. Jumladan, 6ta «dubl» va 1ta «xet-trik» qayd etdi.

4. Robert Levandovski rekord ortidan rekord o‘rnatib, sira charchayotgani yo‘q. To‘g‘ri, polshalik goleador yo‘l-yo‘lakay muhim to‘xtamga kelishi kerak. Ya’ni «Bavariya» bilan shartnomasi muddatini uzaytirish  yoki bosh­qa klubga o‘tish masalasini tezroq hal qilishi lozim.

5. Reytingga tushgan yana bir «notanish». Jey Donnelli elit turnirlardan uzoqda, ammo uning statistikasini e’tiborsiz qoldirish qiyin, baribir. 26 yoshli markaziy hujumchi Shimoliy Irlandiya ligasida shunchaki, «portlash effekti»ni yuzaga keltirmoqda.

6. Allaqachon 30 yoshni urib qo‘ygan Rikardu Gomes butun faoliyatiga tatiydigan mavsumni boshdan o‘tkazmoqda. Markaziy hujumchining yozgacha gol urish bobida shaxsiy rekordini yangilashi - 99 foizga aniq masala.

7. Muhammad Saloh shaxsiy ko‘rsatkichlar bo‘yicha mavsum-2017/2018dan keyingi eng yuqori notaga chiqdi. Misrlik 29 yoshli vinger APLning 3-9-turlari oralig‘ida to‘xtamay gol urdi. U shuning barobarida «Chelsi» va «Manchester Siti» darvozasini nishonga oldi, «MYU»ni esa «xet-trik» bilan «siyladi».

8. Kilian Mbappe joriy mavsum merganlik fazilatini u qadar ko‘z-ko‘z qilayotgani yo‘q. Har holda, avvalgi chem-pio­natda 27ta gol urgandi. Ikkinchi tomondan, 13ta samarali uzatma Fransiya futboli yulduzi faoliyatidagi rekord­dir.

9. Xavining sobiq jamoasida chin yetakchisi bor - 25 yoshli vinger Akram Afif. U hozirda shaxsiy rekordini yangilashga intilmoqda. Buning uchun esa «Gol}pas» tizimida 48 ochko (mavsum-2018/2019dagi natijasi) to‘plashi kerak. Ha, vazifa oson emas.

10. Kristofer N~Kunku 2019/2020 yillar mavsumida assistentlik mahoratini ko‘rsatib, Bundesliga doirasidagi 32ta o‘yinda 15ta samarali uzatma muallifiga aylangandi. Keyin nisbatan samarasiz mavsumda o‘zini to‘liq angladi, chog‘i, endi gol urishni ham o‘rniga qo‘ymoqda. «RB Leypsig» esa Kris­toferni 75 million yevrodan kamiga sotmoqchi emas.

Joriy mavsum jahon milliy chempionatlarida «Gol}pas» tizimi bo‘yicha eng ko‘p ochko to‘plagan futbolchilar (7 aprel kungi holat)