Nemanya Matich erkin agent sifatida rasman «Roma» safiga kelib qo‘shildi. U rimliklar bilan 2 yilga mo‘ljallangan shartnoma imzoladi.

Bir qaraganda, oddiy transfer, APLdan Italiyaga ko‘chishlar so‘nggi yillarda ko‘paygan. Ammo bir jihat alohida e’tiborga molik.

«Roma»ni Joze Mourinyo boshqaradi va u uchinchi marta Matichni o‘z jamoasi safiga qo‘shib olmoqda. Bir murabbiy uch marotaba bir futbolchini sotib olganini boshqa eslolmayman.

Avval 2013 yilda u «Chelsi»ga qaytgach, bir yil o‘tib, Matichni «Benfika»dan Londonga qaytardi. O‘sha mavsumdayoq «Chelsi» Angliya chempioniga aylandi.

2016 yilda Joze Manchesterga keladi va yana bir yil o‘tib, serbiyalik yarimhimoyachi «Old Trafford»ga olib kelinadi. O‘sha mavsumda «MYU» Joze bilan, umuman, Fergidan keyingi davrda eng ko‘p ochko to‘playdi — 2-o‘rin.

Endi esa, «Roma». Matich doim Joze jamoalariga yetishmagan qism bo‘lib, uning qo‘shilishi jamoani kuchaytirganini e’tiborga olsak, «Roma» uchun yaxshi transfer. Shubha yo‘q.

Qahramon Aslanov.