Неманья Матич эркин агент сифатида расман «Рома» сафига келиб қўшилди. У римликлар билан 2 йилга мўлжалланган шартнома имзолади.

Бир қараганда, оддий трансфер, АПЛдан Италияга кўчишлар сўнгги йилларда кўпайган. Аммо бир жиҳат алоҳида эътиборга молик.

«Рома»ни Жозе Моуриньо бошқаради ва у учинчи марта Матични ўз жамоаси сафига қўшиб олмоқда. Бир мураббий уч маротаба бир футболчини сотиб олганини бошқа эслолмайман.

Аввал 2013 йилда у «Челси»га қайтгач, бир йил ўтиб, Матични «Бенфика»дан Лондонга қайтарди. Ўша мавсумдаёқ «Челси» Англия чемпионига айланди.

2016 йилда Жозе Манчестерга келади ва яна бир йил ўтиб, сербиялик яримҳимоячи «Олд Траффорд»га олиб келинади. Ўша мавсумда «МЮ» Жозе билан, умуман, Фергидан кейинги даврда энг кўп очко тўплайди — 2-ўрин.

Энди эса, «Рома». Матич доим Жозе жамоаларига етишмаган қисм бўлиб, унинг қўшилиши жамоани кучайтирганини эътиборга олсак, «Рома» учун яхши трансфер. Шубҳа йўқ.

Қаҳрамон Асланов.