Shu kunlarda Qozog‘istonda boks bo‘yicha xalqaro "Elorda Kubogi" musobaqasi o‘tkazilmoqda. Bahslarda O‘zbekiston ayollar terma jamoasi a’zolari ham qatnashishmoqda.

O‘zbekiston ayollar terma jamoasi bosh murabbiyi Elshod Rasulov musobaqadagi ishtirok, raqiblar va turnir haqidagi fikrlarini bildirib o‘tdi.

"Ayni paytda xalqaro turnirda ishtirok etish qizlarimiz uchun juda zarur edi. Chunki, formani ushlab turish va tajriba oshirish muhim ahamiyat kasb etadi. Shu sababli ham Qozog‘istondagi xalqaro turnirda ishtirok etmoqdamiz.

Ushbu turnirda Xitoy terma jamoasi qatnashmoqda. Shuningdek, Hindiston vakilalari ikkita tarkib bilan, mezbon Qozog‘iston esa 4 ta tarkib bilan ishtirok etmoqda. Qolaversa, Qirg‘iziston, Mo‘g‘uliston va O‘zbekiston terma jamoalari g‘oliblik uchun kurash olib boradilar.

Qur’a natijasiga ko‘ra qizlarimiz dastlabki bosqichlarda asosan qozog‘istonlik raqibalarga to‘qnash kelishadi. Yaxshi bilasiz, Hindiston va Xitoy terma jamoalari nafaqat Osiyo, balki jahon miqyosida ham ayollar boksida yetakchi hisoblanadi. Mezbon Qozog‘iston ham Osiyoda o‘z o‘rniga ega. Yuqorida sanab o‘tilgan uchta mamlakat va O‘zbekiston terma jamoasi a’zolari o‘rtasida qizg‘in janglar bo‘lishi kutilmoqda.

Yana bir qo‘shimcha ma’lumot: Xitoy terma jamoasi musobaqaga asosiy tarkibi bilan kelgan. Hindiston ham 1 va 2-raqamli bokschilari bilan qatnashyapti. Ushbu musobaqa O‘zbekiston ayollar terma jamoasi uchun katta tajriba maktabi bo‘lishi shubhasiz", - dedi Elshod Rasulov O‘zbekiston boks federasiyasi matbuot xizmatiga bergan intervyusida.