Шу кунларда Қозоғистонда бокс бўйича халқаро "Елорда Кубоги" мусобақаси ўтказилмоқда. Баҳсларда Ўзбекистон аёллар терма жамоаси аъзолари ҳам қатнашишмоқда.

Ўзбекистон аёллар терма жамоаси бош мураббийи Элшод Расулов мусобақадаги иштирок, рақиблар ва турнир ҳақидаги фикрларини билдириб ўтди.

"Айни пайтда халқаро турнирда иштирок этиш қизларимиз учун жуда зарур эди. Чунки, формани ушлаб туриш ва тажриба ошириш муҳим аҳамият касб этади. Шу сабабли ҳам Қозоғистондаги халқаро турнирда иштирок этмоқдамиз.

Ушбу турнирда Хитой терма жамоаси қатнашмоқда. Шунингдек, Ҳиндистон вакилалари иккита таркиб билан, мезбон Қозоғистон эса 4 та таркиб билан иштирок этмоқда. Қолаверса, Қирғизистон, Мўғулистон ва Ўзбекистон терма жамоалари ғолиблик учун кураш олиб борадилар.

Қуръа натижасига кўра қизларимиз дастлабки босқичларда асосан қозоғистонлик рақибаларга тўқнаш келишади. Яхши биласиз, Ҳиндистон ва Хитой терма жамоалари нафақат Осиё, балки жаҳон миқёсида ҳам аёллар боксида етакчи ҳисобланади. Мезбон Қозоғистон ҳам Осиёда ўз ўрнига эга. Юқорида санаб ўтилган учта мамлакат ва Ўзбекистон терма жамоаси аъзолари ўртасида қизғин жанглар бўлиши кутилмоқда.

Яна бир қўшимча маълумот: Хитой терма жамоаси мусобақага асосий таркиби билан келган. Ҳиндистон ҳам 1 ва 2-рақамли боксчилари билан қатнашяпти. Ушбу мусобақа Ўзбекистон аёллар терма жамоаси учун катта тажриба мактаби бўлиши шубҳасиз", - деди Элшод Расулов Ўзбекистон бокс федерацияси матбуот хизматига берган интервьюсида.