"Paxtakor" Superliganing 25-turida Toshkentda "Qizilqum"ni qabul qiladi.
Chempionat doirasida jamoalar 45 uchrashuvda maydonga tushishgan. O‘zaro o‘yinlar bo‘yicha ustunlik yaqqol toshkentliklar tarafida. 38 bahsda zafar quchgan "Paxtakor" 6 bor raqib bilan durang o‘ynagan va bir marta imkoniyatni boy bergan. "Qizilqum" darvozasiga 124 gol urilib, 26 to‘p o‘tkazib yuborilgan.
Toshkentdagi uchrashuvlarning 19tasida "sherlar" g‘alaba qozonib, 2 durang va 1 mag‘lubiyatni qayd etgan. Navoiy jamoasi oxirgi marta safarda 2010 yil ochko olgan - 0:0. O‘z maydonida "Paxtakor" 7 bor ushbu raqibni yirik natija bilan taslim qilgan. O‘tgan mavsumda Toshkentda jamoamiz 4:2 hisobida zafar quchishga erishgandi.
Bu jamoalarning 2007 yil Navoiyda o‘tgan bellashuvida O‘zbekiston oliy ligasi tarixidagi eng yirik natija qayd etilgan. O‘shanda "Sherlar" mezbonlar ustidan 11:0 hisobida zafar quchishgan. O‘shanda "Paxtakor" hozirgacha rekord sanalgan yirik g‘alabani qo‘lga kiritgan.
Bahsni "Paxtakor"dan Hojiakbar Alijonov, "Qizilqum"dan Bobur Yo‘ldoshev diskvalifikasiya tufayli o‘tkazib yuboradi.
"Paxtakor" va "Qizilqum" jamoalari o‘rtasidagi bellashuv 7 noyabr, dushanba kuni soat 18:30da "Paxtakor" stadionida boshlanadi.
