Юртимиздаги футбол сайтларидан бирида Самарқанднинг "Регистон" клуби мураббийи Ҳайдар Кенжаев ўз хоҳиши билан истеъфога чиққани ҳақида хабар тарқатилган эди.
Биз бу масалага ойдинлик киритиш мақсадида клуб бош директори Эркин Юсуповга қўнғироқ қилдик. Э.Юсуповнинг айтишича, Ҳайдар Кенжаевнинг истеъфога чиққани миш-мишдан бўлак нарса эмас. Самарқанд футболига кўплаб шогирдлар етиштириб берган ушбу мутахассис ҳамон жамоа бошқарувида.
Иккинчи босқичнинг дастлабки икки турида меҳмонда қайд этилган 2:3 ҳисобидаги мағлубиятларни изоҳлар экан Э.Юсупов шундай деди:
"Дастлабки учрашувлар жуда жанговар руҳда ўтди. Айтиш мумкинки, таркибимизда бир қатор етакчи ва умидли футболчиларимиз жароҳатланган. Шу сабабли захира таркибимиз хизматларидан фойдаландик ва учрашувларда омад ҳам биздан бироз юз ўгирди. Навбатдаги учрашувларда самарқандлик мухлисларни ғалабалар билан хушнуд этишга ҳаракат қиламиз. Юртимиздаги спортга оид оммавий ахборот воситалари ходимларига эса клубимиз тақдирига бефарқ эмасликлари учун жамоамиз номидан миннатдорчилик билдириб қоламан".
