Karl-Xayns Rummenigge "Bavariya" va Bundesligadagi ta’qibchilar o‘rtasidagi asosiy farqni aytib o‘tdi. Unga ko‘ra, myunxenliklar har qanday holatda jamoa yetakchilarini sotmaslikka qurbi yetadi.
Rummenigge “Bavariya”ning oltin transfer qoidasi haqida shunday gapirdi:
"Bavariya" va "Borussiya" yoki "Leypsig" o‘rtasidagi katta farq shundaki, bu klublar har xil falsafaga ega. Jumladan, turli iqtisodiy sharoitlar tufayli. "Bavariya" hech qachon Bellingem yoki Nkunku kabi futbolchilarini sotmaydi. Bizda "oltin transfer" qonuni bor: jamoa uchun muhim bo‘lgan o‘yinchi qolishi kerak, garchi u uchun ko‘p pul to‘lash kerak bo‘lsa ham.
Karl-Xayns Myunxenda shunday qoida paydo bo‘lganini esladi. Hammasi klub afsonasi bilan boshlangandi:
“2008 yil edi. O‘shanda Frank Riberi uchun ikkita ajoyib taklif olgandik: biri Ispaniyadan, ikkinchisi esa Angliyadan deyarli rad etib bo‘lmaydigan. Uli Xyoness, Karl Xopfner va men Tegernzeeda Frank Riberi bilan uchrashdik va unga shunday dedik: “Siz hamma narsani ostin-ustun qilib tashlashingiz mumkin, lekin baribir jamoada qolasiz. Imkoniyatlarimiz chegarasida sizga yangi shartnoma taklif qilamiz. Shunday qilib, Frank "Bavariya"da qoldi va biz bu oltin qoidaga ega bo‘ldik. Biz u qoidadan shu kungacha foydalanamiz. Aytaylik, Musialani 100 million yevrodan ko‘proqqa sotishimiz mumkin. Ammo bunday oltin futbolchini qayerdan topamiz? U nafaqat maydonda, balki ajoyib inson. Bunday futbolchilarni qo‘yib yuborib bo‘lmaydi”.
Yozda esa "Bavariya" jamoa yetakchilaridan biri bilan xayrlashdi - Robert Levandovski "Barselona"ga o‘tdi. Albatta, polyak endi yosh emas, lekin baribir u jamoa hujumini boshqarar edi.
Shunga qaramay, Rummenigge aytgan klubning temir qonuni juda mantiqiy ko‘rinadi.
Ammo boshqa Bundesliga klublari Myunxenning oltin qoidasini o‘zida qo‘llay oladimi?
